利物浦首捧英超

(Getty Images图片)

(Getty Images图片)

高普激动流泪球星高呼Ole!

本年度英超王者诞生!曼城周五凌晨联赛作客车路士,因后防犯错失守,最终以1比2落败,令榜首利物浦取得足够分数,提前夺得英超冠军,相隔30年再度赢得顶级联赛锦标。赛后约有2,000名球迷涌到利物浦主场晏菲路球场外庆祝,放起红烟通宵高歌狂欢。一班利物浦球员亦疯狂庆祝,领队高普接受视像访问时,更加激动到流下男儿泪,场面感人。

先讲曼城对车路士场波,「蓝月亮」喺阿古路受伤缺阵下,今仗排出「无锋阵」,踢到36分钟更因为根度简同班捷文文迪喺中圈出现误会,被车仔嘅基斯甸普列锡单刀埋门射死角入网,车路士领先1比0完半场。下半场初段曼城变阵,55分钟由奇云迪布尼罚球直射建功扳平。不过去到75分钟费兰甸奴犯手球,输12码兼领红牌,韦利安为车路士操刀射成2比1完场。

提早7轮封王破纪录

曼城输波,落后利物浦23分,奠定红军提前7轮夺冠,亦创下英格兰顶级联赛史上最快捧盃纪录。之前曼联(1907/08、2000/01)、爱华顿(1984/85)同曼城(2017/18)都只係试过提前5轮夺冠。今次係利物浦历史上第19个顶级联赛冠军,亦係首个英超冠军,成为继曼联、阿仙奴、布力般流浪、车路士、曼城同李斯特城后,第7支拎到英超冠军嘅球队。

一班利物浦球员呢晚亦搞咗个睇波Party,直击车路士赢波带挈封王后,所有球员疯狂庆祝,喺流出嘅睇波派对影片所见,华基尔云迪积克、艾利臣比加、沙迪奥文尼、罗拔图法明奴等主力都有出席,当韦利安为车路士射入12码后,众星立即激动欢呼,到差唔多完场嗰阵,一班球员更齐齐倒数,直到球证吹鸡完场,就一齐高唱「冠军!冠军!Ole,Ole,Ole!」

之后到高普接受《天空体育》视像访问,着起利物浦波衫嘅高普仲忍得住唔想爆喊,但见到名宿杜格利殊向佢致敬,高普就喊到面容扭曲。高普表示:「实在係难以置信,(捧盃)感觉超乎我嘅想像。知道杜格利殊一直好支持我哋,呢个冠军係畀你嘅,亦係畀谢拉特嘅,呢度所有人都仰慕你(谢拉特),利物浦有非凡历史,我比唔上大家等咗30年,我只係等咗4年半,但呢个绝对係伟大成就。」

谢拉特:尽情狂欢吧!

2013/14球季季尾对住车路士一战跣脚,连累球队输波主场0比2落败,最后以2分之差,输埋个冠军畀曼城嘅传奇队长谢拉特,非常激动咁喺个人IG恭贺:「呢班杰出嘅球员创造了不可思议嘅成就,当然离唔开有一位世界顶级嘅主帅及教练团队嘅领军,以及FSG嘅背后支持。最后亦係最重要嘅就係等待30年嘅粉丝,尽情狂欢吧!」

多位球星及体坛名将亦纷纷出post贺红军夺标,曾经同谢拉特做队友嘅奥云、费兰度托利斯、阿历山大阿诺特、占士米拿及路尔斯加西亚等喺Twitter留言,而作为利物浦股东之一嘅NBA巨星勒邦占士更连发4条留言恭贺爱队,勒邦喺个人Twitter写上:「英超冠军!!!冲冲冲@利物浦#你永不独行」跟住再喺利物浦官网再留言,可见「大帝」开心到爆!

留言与评论(共有 0 条评论)
   
验证码: